Acts 1

1Aria emar, Tiofilus, yo opor oko mokomokoka siisimomem nain feenap, iiriw Yeesus miiwa-pa fan ikok emeria mua opora wia maakemi mauwowa uuwam-ikok umok. Ne Mua Maneka-ke aawep owow iinan purupok nain siisimem. 3O umep ikok iikirap anane maneka wiar imenarem-ikaeya fofa ten erepam arek. Wiar imenarem-ikua nain ona kekanowa-pa maa miililina unowa oneya wiar urufap maemik, makena o iikirak. Ne wi aposel wia pepekimok nain uuwow sira wia maakeya Ewar Eliwa-ke kema-pa wiar wuam-ikua, wi emeria mua Mua Maneka pika kemena wiar ekowa nain. 4Iir oko wi wiam fiirimep ikaiwkin wia maakek, “Ni Yerusalem owowa me piipueka, feekeriw ikeka. Yo iiriw nia maakem. Feek ikok Auwa ona Ewar Eliwa sesekowa maek nain arewam-ikeka. 5Moram iiriw Yon-ke ekaiw nia yasuwap ikaeya ikeman. Aakisa fain ni arewap ikaiwkin epa me ekowa Auwa Ewar Eliwa sesekeya orop nia kekanowinon.”

Wi Yeesus uuwow teeria o wameiya fiirimemik

6Aria wi aposel ekapep Yeesus wameiya fiirimep ikok nokaremik, “Maneka, no aakisa ara fain i owow oko anim onoma tepak-pa wiar ikemik nain eliw wia iirareya-ko i Isrel yieniw yiam urufam-ikaiyen-i e kamenap?” 7Ne wia maakek, “Maa nain ni amisarowa-ke weetak. Ni maeman nain Auwa ona kookalowa-pa iiriw epa pepekimep-puak. Ne iir kaanin ariman wuinon, nain me amisaremik. 8Ikoka Ewar Eliwa-ke niar orop nia kekanoweya ni kekanowa aawep yo opora efar maow mua ikowen. Naeya ni ikiwep wi Yerusalem, Yuudia, Samaria ne miiwa fain owow unowa wia maakem-miawowen.”

9Aria Yeesus opora naap wia maakeya Mua Maneka-ke owow iinan purupok. Purupem-ikaeya wi naap mokakem-ikaiwkin maa ipisia-ke mesalimok. 10Wi urufam-ikaiwkin mua wiam erup, mia suuwowa kia akena nain-ke nan-pariw wiar imenarep wia maakemik, 11“Ni Galili mua, ni moram naep fan iimarep ikok mokoka aapereka mokakem-ikaiman? O owow iinan urupok nain ikoka sira naapiw miiwa orainon.” 12Naap wia maakiwkin wi Oliw ema piipuap kirep Yerusalem ikiwemik, nain me epasia.

13Ne wiena ikemik nain koora samapora iinan-pa ikua. Ne wi ikip fuunep koor kemena urupemik. Teeria nain wi feenap: Pita, Yon, Yems ne Andru, Filip, Tomas, ne Batolomiu, Matiu, Alfius muuka Yems, ne Saimon, ne oko Yems womawa muuka Yuudas, naap. Wi Rom anim onoma wia kerewimik nain mua oko Saimon naimik. 14Wi teeria nain anane wiam fiirimep kema kuisow wuap Mua Maneka farem-ikemik. Ne Yeesus onak, Maria, ne emeria papako ne ona wiamun teeria pun wiamiya ikemik.

15Aria iir oko wi wiam fiirimemik nain mua andet kuisow ten erup (120). Wiam fiirimep ikok Pita-ke iikirap maek, “Aria emawik, iiriw Mua Maneka Ewar-ke Dewit kema iweya Yuudas sira wiar maek nain makena arek. Yuudas-ke iiwua seewa wia opeya urupep Yeesus opamik. 17Iiriw Yuudas Yeesus-ke uuwowa fain pepekimeya teeria-pa yiar ikua nain,” naap maek.

18(Ne Yuudas sira samora Yeesus onak nain maamuma iwiwkin miiw ara oko sesenarek. Miiwa sesenarek epa nan iimarep ikok wakiemi uroma pukep urom pamua nain miiwa-pa bolanep orok. 19Wi Yerusalem-pa ikemik nain miimap miiw ara nain wiena oporiw unuma “Akeldama” naimik, unuma nain kemena feenap, “Aka orow miiwa”.)

20Ne Pita-ke nainiw maek, “O naap arek nain someka buk-pa feenap siisimep-puamik,

‘Ona miiwa oram neek wiar ikainok, mua kuisow neeke me wiar ikauk.’
(Someka 69.25)

Ne opora fain pun siisimep-puamik,

‘O uuwowa nain mua oko-ke epa wiar aawinok.’
(Someka 109.8)

21Naapeya mua kuisow epa wiar aawep i teeria yiar epinok. Naeya yiena Maneka umep iikirak opora nain os pun maow mua ikainok. Mua eena iiriw yiena Maneka Yeesus fan ikua nain yiamiya soomarem-miemik mua nain wia urufiyen. Iiriw Yon o eka-pa yasuweya mauwowa onoma wuak. Ne mua nain pun i yiamiya soomarem-ikua. Mua Maneka-ke Yeesus aawep iinan purupok nain i unowiya urufamik, wi mua naap nain mua kuisow pepekimiyen.” 23Pita-ke naap maeya mua erup wia unufamik. Mua oko Yosep ne oko Matias. (Yosep unuma arow, oko Basabas, oko Yastus.) 24Mua wiam erup wia pepekimep wi unowiya Mua Maneka farep nokaremi maemik, “O Maneka, no i mua unowiya kema yiar amisaren, mua kain-ke Yuudas epa wiar aawinok naep-na amisa yie. Yuudas eena iiriw mauwowa nain piipuap ikok umok nain. Naeya mua nain-ke epa wiar aawep aposel uuwowa oninok.” 26Wi Mua Maneka naap nokarep mua wiam erup unuma wiar wuap mua kuisow pepekimu naep onam-ikaiwkin, Mua Maneka-ke Matias pepekimok. Matias pepekimeya wi aposel kiiriw ten kuisow erup arek.